In 1992, 3×11 jaor geleje, gebore op noewjaorsdaag in Kelpen-Oler. Tot meug aan toe de brök op en aaf gefietsj want in mien hert bèn ich altied ‘ne Moeëreboek gewaesj. Zoon van aodprins Sé en aodprinses Elly van de Kuijeldreijers en breurke van aodprins Luuk dea precies 11 jaor geleje in ós Moerelandj veurop ging.
Gelökkig al ‘ne hieële tied woeënachtig in Èll, woeë ich same woeën mèt mien prinses Pleun van Vleishouwers. Sins kort höbbe wea ós eige stekkie aan de Jasmijnstraot, waat noe ómgeduiptj weurtj tot de Prinsestraot. Pleun is waal gebore en getoge in Èll, mer de einige in de familie Vleishouwers mèt ‘n Èller accent. Beide zeen wae vastelaovesveerders in hert en nere, die moejlik heives kónne gaon. Biegestange door aodprinse Luuk en Rick, aodprinsesse Robin en Joreth en Cauven en Dorthe.
Vereinigingslaeve en ciefers staon veur mich centraal. Zoëe bèn ich de nummer 10 van ‘t vlaggenschip van DFO ’20: ’t Derdje, goeëj ich gaer ‘n pielke bie DC 9 II, 2 kieër per jaor te vinje in ‘t Brook mèt Stichting Spook, al 5 jaor trotse veurzitter van ‘t Kindervakantiewerk Ell en dit jaor veur de 17e kieër actief oppe Bóntje Aovendj mèt “3x Niks”. Zeldzame fan van 16-voudig landskampioen en de sjoeënste club van Nederlandj: mien Feyenoord. Daonaeve gaon ich gaer mèt mien prinses op vakantie. Aaf en toe wieët wèg, mer zeker eine kieër per jaor snowbaorden in Oeësteriek. De gemeine deiler in al dees dinger is ein lekker kaod glaeske beer, waat wae allebei neet gauw euverslaon.
Óm dit allemaol te kónne bekostige wirk ich onnog. 40 van de 52 waeke op ‘n jaor rie ich nao ’t stedje van lol en plezeer en staon ich veur de klas als wiskunde docent.
Bie de gratie van Groeëtvorst Jan, Groeëtvorst Henri, Vorst Steef en de Raod van Elf verklaor ich ’t volgendje:
● Det ich mèt mien prinses Pleun, adjudante Luuk, Rick, Cauven en heur dames Robin, Joreth en Dorthe d’r alles aan gaon doon óm van deze vastelaovendj ein geweldjig fieëst te make!
● Det wae dit samen doon mèt ’t jeugprinsenpaar, heur adjudante en de jeugdraod
● Hiebie raekene wae nateurlik ouch op de men en dames van de Raod van Elf.
● Det wae, boete ‘ne houp vleisboeket, ouch moge gaon geniete van live muziek van de Ellenthaler en de Kaolderband.
● Det “3x Niks” dit jaor neet mèt duit in de optocht bie de klein groepe, mer veur de ieërste pries geit bie de einzel gengers. Hé Gert
● Det Spieje alweer de 3e prinses in de groep heet, dus die gaon zeker weer gaas gaeve dees daag.
● Det mien kammereuj van de Vervaelers, óndanks det ich neet officieel bie heur in de groep zit, ouch neet aan de kantj blieve staon.
● Det d’r mer ein dink is woeë wae Moeërebuuk veur laeve, vastelaovendj is alles gaeve!
Det ich dees daag zal regere in de Orde van de Wortel.
En dit alles onger mien motto:
‘t Is geine hoeëgere wiskunde mieër, alles gaeve, kieër op kieër!!
